دده لر دده سي دده كاتيب قولنجي(قولونجو)
قادر الله گؤر نه گونه قالمیشیق
باغچا بیزیمکی دیر گول بیزیم دئییل
سن بؤلن بؤلگولر قابول اولمادی
پتک بیزمکی دیر بال بیزیم دئییل
باهار چاغی گؤی گئییلر صحرالار
ذوقا گلیب دالغا وورار دریالار
یاغمور یاغار یاشیللانار یایلالار
یایلا بیزیمکی دیر ائل بیزیم دئییل
قؤیونو چالدیلار خائیین چوبانلار
خارایولداش اولدو ناشی باغبانلار
اود توتوب معدنلر ،آلیشدی کانلار
معدن بیزیمکی دیر لعل بیزیم دئییل
نه توفاندیر نه قاوقادیر نه دومان
آتش آلیب خرمن یانیر یان ها یان
دده کاتیب دیلین ساخلا دور دایان
اوره ک بیزیمکی دیر دیل بیزیم دئییل
مغرور اولما
اینسان اوغلو مغرور اولما حالا حالدا گــــئده جک
چین چین اولاجاک صورتین خط خالـدا گـئده جک
زامان چرخی پوزدوراجاق دال بوداغین سـولاجاق
دوز قامتین بـوکـوله جک بو جمال دا گـــــئد ه جک
اؤزون چالما داغا داشا ایشینده توت بیر حیساب
روزی بؤلن روزی بؤلوب حددســـیز ائتمه شـیتاب
بوتون دونیا سـنین اولـــسا سون یئرین زیر تــراب
حساب سنین مال واریثین خام خـیالدا گئده جک
قارون کــیمی مال ییـغاسان یل دسـتان اولاسـان
یا درویش گوشــه نشـــین یادا ســـولطان اولاسان
یا بــیر آجـــی دیلـــین اولا یادا غــزلخوان اولاسان
کســـیله جل نــطـق بــیان لب بال دا گــــئده جک
دده کاتیب خان اولاسان خلقه فرمان دئــیه سن
بـــیر یاوان چوره گـــین اولا یادا بــــیریان یــیه سن
یا بــیر ییرتیق دونــــون اولا یادا الوان گــــئیه سن
سؤکوله جک تیکمه لرین تیرمه شــال دا گئده جک
بو وئبلوگ تورک دونیاسینین و اؤزه للیک له آذربایجانین بؤیوک عاریف و شاعیرینین( دده کاتیب آدی ایله تانینان حاج عبدرالرحمان طیار قولونجو) یارادیجیق لارینی و شعیرلرینی یایاجاقدیر.