اولیندن عادتیم دیر سؤزده یالان دئمرم

من توركجه دانیشارام دیله زبان دئمرم

آنام منی اوشاقلیقدان تورك دیلی دانیشدیریب

  آتام منه چؤره ك وئریب چؤره گه نان دئمرم

من آنامین امجگیندن توركجه سود اممیشم

 ایندی ده امجك دئییرم داحی پستان دئمرم

سو ایچنده ذوق ائده رم داد وئرمز آغزیمدا آب

سرین له سم كؤلگه لیكده دا سایبان دئمرم

دریالاردا گمی لری گزدیرر گمیچی لر

چوخ گؤزل دیر گمیچی لیك دا كشتیبان دئمرم

ائو ـ ائشیگیم ایشیقلانار قوناقلاری گؤرنده

 من قوناغی چوخ سئورم آمما مهمان دئمرم

آنام منه دون تیكردی سیریق ـ سیریق آرخالیق

 كؤینگیمین اتگینه داحی دامان دئمرم

اول ائوده اوشاقلارا تورك دیلینی اؤیره درم

  آنا یا آنا دئیه رم دا مادرجان دئمرم

بیر گؤزه لی تعریف ائتسم توركوجه سؤز قوشارام

 كیپریگین اوخ قاشلارین یای، ابرو كمان دئمرم

بئشیگه گهواره دئمم او منی ییرقالاییب

صوبحه كیمی گودوكچویه من نگهبان دئمرم

قونشویا همسایه دئمم من یولداشا دا همراه

اوغولا اوغول دئیه رم هئچ پسر جان دئمرم

اكینچی یم  یوخ كشاورز، تورپاغا خاك سؤیله مم

 اولدوزا ستاره دئمم گؤیه آسمان دئمرم

گؤی گورولدار یاغمور یاغار  یاشیل لانار یایلالار

هر نه قدر یاغیش یاغسا اونا باران دئمرم

دگرلی یه دگر وئررره م ارزشدن چیخماز باشیم

اوجوزا اوجوز دئیه رم داحی ارزان دئمرم

آتا ـ بابام تورك دور منیم توركوجه دانیشارام

فارسی دا خوش شیرین دیلدیر خوشا یامان دئمرم

 دده كاتیب تورك اوغلویام چوخ دادلی دیر دیلیمیز

 ماهی یه بالیق دئیه رم سونا پایان دئمرم.